Matthew 27
Wawaya Yesu irutini Pailat kurina.
(Mak 15:1; Luk 23:1-2; Jon 18:28-32)
1Mara boiboiyai na taparoro babadisi i babada ma Jiu damsi i babada kudubisi ivi ogatara da ikikava Yesu iti raboboi. 2Ma imana ikuni ma irutini inae Pailat kurina. Tuna na Rome kana bada sago ma ivonatawei da Judiya dobuna ivivi badei.Judas irabobo.
(Apos 1:18-19)
3Judas, tuna viwawana wawayina na sisiya ivi yanei da Sanhidran babada ivi vaghinei da Yesu iti raboboi. Ma damina iviiya da bera berona iberai na ivi nuwapoya kirakai. Ma nani 30 silva riririghisi taparoro babadisi i babada ma Jiu damsi i babada gwabisiyai iviiya na ikavari ivovira da ita vere meyesi. a 4Ma ivonesi bo, “Abera beroi da wawaya ina berabero kegha ma avi wawanei da koni raboboi.”Ma ivonapotei bo, “Tam kava kam wavu. Tokai ke kati nuwapoyei.”
5Vaghina ma, Judas nani 30 silva riririghisi Taparoro Numana ku kamona ivi tawetaweyana. Ma ikiibau inae da iruke.
6Taparoro babadisi i babada nani riririghisi iyuna ma ivona bo, “Weni tuna na puka manena, ma vonaviyoyovana evonavoneta da ke ruvaruvana da Taparoro Numana kana mane yavata tikiikapui.” 7Ivi dughu ma ivi vaghinei da riririghisi ivoviviri na bayawa yamoyamona wawayina gwabinai tano igimari da kupuna damsi kii karawaga. 8Tuna kubiine nani tanona patana da ekwatukwatui da ‘Tara Tanona.’
9Weni tanona igimari na ikikava peroveta Jerimaya ivi sisiyei na berana itupuwa. Ivona bo, “Israel damsi ivi vaghinei da wawayina kana miiya na 30 silva riririghisi. Ma manena iviiya b 10da iruvoviviri da bayawa yamoyamona wawayina gwabinai tano igimari. Ikikava Bada sisiya bagibagina iverevereku na nakanani itupuwa.”
Pailat, Yesu ivi tupavirei.
(Mak 15:2-5; Luk 23:3-5; Jon 18:33-38)
11Yesu na Judiya dobuna kana bada Pailat maghinonai imiimiiri ma Pailat ivi tupavirevirei. Ivi tarakiiyanei bo, “Tam Jiu damsi i kiivavo, bo?”Ma Yesu ivona bo, “Vaghina, kuvona bubuna.” 12Ma taparoro babadisi i babada ma Jiu damsi i babada ivi karei da Yesu ivivi wavui na ke ita vonapotesi.
13Tuna kubiine Pailat ivi tarakiiyanei bo, “Kade, wavu kudubina evereverem na kiyanesi bo kegha?”
14Ma Yesu ivi kawapotapota da i sisiya ke sago ita vonapotei na Pailat ivi deye kirakiiyei.
Pailat ivonakiiyaragha da Yesu ini raboboi.
(Mak 15:6-15; Luk 23:13-25; Jon 18:39-19.16)
15Pailat ina bera imakamakai da Pasova kamna nununai koroto i kayowanai wawaya sago gabura kamonai ina votawei. 16Ma nani maranai tomowa sago gabura kamonai imakamakai, kana vava Barabas. Ma wawaya peyarina iakovi da tuna tomowa kayakayayina. 17Ma koroto ghamana ipisi na Pailat ivi tarakiiyanesi bo, “Meni wawayina kokayokayowei da kubiimi ana votawei? Barabas bo Yesu, tuna na wawaya viya evonavonei da God ina Vivinevine Wawayina.” 18Pailat iakovi da taparoro babadisi i babada na Yesu inuwakapiyei, tuna kubiine irutinapiyei kurina.19Ma Pailat vitupavira gawarinai imakamakai na kawana sisiya ivonatawei kurina. “Nani wawayina kevoterei. Ke aviyavisina sago kuna berai kurina. Tuna ina berabero kegha. Taku didibarai wawayina avi matuwei na ayabumana kirakai.”
20Ma taparoro babadisi i babada ma Jiu damsi i babada koroto ghamana ivivi nuwatinisi da ita vona bo, “Barabas kevotawei ma Yesu na kevi raboboi.”
21Ma Pailat ivi tarakiiyana meyesi bo, “Wawaya na ruwa, ma meni wawayina kokayokayowei da ana votawei kubiimi?”
Ma peyarisi ikarayogosi bo, “Barabas!”
22Ma Pailat ivonesi bo, “Ma weni tomowina Yesu, wawaya evonavona da tuna na God ina Vivinevine Wawayina na ikikava ana berai?”
Ma kudubisi ighekiirara bo, “Kotuparatui!”
23Ma bade ivonapotesi bo, “Avi kubiine kana tuparatui? Aviyavisina ibera beroi?”
Ma kegha da koroto ighekiirarame. “Kotuparatui! Kotuparatui!”
24Pailat damina iviiya da ke kovokovoghina da wawaya i nota ita tinavirai. Ma ikitai da gisina kava viruwa ghamana ita tupuwa. Tuna kubiine bigabiga sago ivonei da okowa ikavarapiyei ma koroto maghinosiyai imana ikowai. Ivonesi bo, “Weni tomowina tarana ina sororo na ke taku wavuna ana kavari, tami mani kami wavu!” c
25Ma wawaya kudubisi nani korotona kamonai ivonapotei bo, “Tarana na tokai ma natunatukai wavuna kana kavari!”
26Vaghina ma Pailat, Barabas gabura kamonai ivotawei da ikiibau. Ma Yesu na ivi damani seri damsi kurisi da ita kwapui ma ita tuparatui.
Seri wawayisi Yesu ivi agaberowei.
(Mak 15:16-20;Luk 23:11; Jon 19:2-3)
27Seri wawayisi viya Yesu irutini i numa garina ku kamona ma seri damsi kudubisi ikwaturiyariyesi da Yesu imiirigwagwari. 28Ma kana gara irupamatawei ma tarasovo yebayebarina ivi kotei. 29Ma urava ere iyiyona iviiya da imetami ma gayamina itaratani, kiivavo kana tarapinawa ivi bonebonei. Ma diwona ku katagheyana iterei. Tuna nakanani ma kiivavo ina diwona. Ma ivi beroberowei da maghinonai ivi tuwaporeruruwana ma ivonavonavinamei. Ivonei bo, “Kiiwa kiiwa, tam Jiu damsi i kiivavo!” 30Ma ikanukanui ma diwona imanai itinaneboi da gayamina iraravi. 31Ivi namei ikovi ma tarasovo yebayebarina ivotawei ma kana gara vaghata ivi kotei. Ma irutini ikiibau da ita tuparatui.Seri wawayisi Yesu ituparatui.
(Mak 15:21-32; Luk 23:26-43; Jon 19:17-27)
32Seri wawayisi Yesu irutini da Jerusalem ikiibutawei inenae. Ma ketiyai tomowa sago ipanani, kana vava Saimon, ina dobu Sairini. ▼ Ma seri damsi idarui da Yesu kana korosi ikavari. 33Inekiibau ku koya sago, kana vava Gorugata. ▼ 34Ma wain ikavarapiyei ma gegura kawakiikwarikwarina yavata igwadai ma Yesu iverei da itumai. Ikara tovoni ma ibarei, ke itumai. f 35Vaghina ma ku korosi ituparatui. Ma seri damsi virekwa sago iberai da kamosiyai Yesu kana gara irereghi. g36Nani murinai imakiivipika da Yesu iti matatetei. 37Ma Yesu gayamina ma ku tepana vonaverena igirumi imakamakai, ivi debei da avi kubiine ituparatui. Igiruma bo, “Weni na Yesu, Jiu damsi i kiivavo.” 38Ma yapiyapi damsi ruwa Yesu yavata ituparatusi, sago katagheyanai ivi miirini ma sago dugenai ivi miirini.
39Ma wawaya ketiyai inenae ma ipipisi na Yesu ikarakara vibagibagiyei ma ikiikiirara, ivonavonaberoberoi. h 40Ivonavonei bo, “Tam kuvona da Taparoro Numana kuta rikai ma mara aroba kamonai kuta vowa meyei. Tam God Natuna, bo? Mede kevi yawasa meyem da korosiyai keoru!” i
41Ma bade taparoro babadisi i babada, vonaviyoyovana vibeyebeyena wawayisi ma Jiu damsi i babada Yesu ivonavonaviiviiyakei. 42Ivonavona bo, “Wawaya bogii ma bogiiyai ivivi yawasisi ma ke kovokovoghina da tuna mani iti yawasa meyei. Ivonavoneta da tuna Israel kana kiivavo na mede tuna mani ina rewapanai korosiyai eoru da takitai ma titumaghanei. 43God itumaghanei ma ivona da tuna God Natuna. Vaghina, takitai da God ekayokayowei da ini yawasi bo kegha.” j
44Ma nani tomotomowisi ruwa Yesu ririnai ituparatusi na ti yavata ivonavonaviiviiyakei.
Yesu irabobo.
(Mak 15:33-41; Luk 23:44-49; Jon 19:28-30)
45Madegha punai dobu kudubina ivi nubakutuvi, ma nakanani imakai da ku ravi madegha. 46Ma ravi madeghinai Yesu ikiirara bo, “Eloi, Eloi, lama sabachthani?” Sisiyina iyamna na “Aku God, aku God, avi kubiine kukuyoweku?” k47Ma wawaya viya ririnai imiimiiri na ivi yana beroi ma ivona bo, “Kovi yana, Elaidiya ekwatukwatui.” 48Ma wawaya sago yaghiyaghinai iverau da gumba ▼ ivokutuvi ku wain kamona. Ma ku kii gurina ivi kavini ma ivororona da Yesu ita karasusui. m
49Ma wawaya viya ivona bo, “Kevoterei. Takitai, kade Elaidiya ina pisi da ini yawasi bo kegha.”
50Vaghina ma Yesu ikiirarame, yapurana itatawei ma irabobo.
51Ma tuna maranai Taparoro Numana kana tupayaragha garana basunai itamosika, tepanai ivi karei da ioru ku kapina da nake ma wike. n Ma nukenuke dobu inukei da wakima ivi tamosepisepiyana. o 52Ma bade karawaga kamonai dogo kawasi itamotate da God ina wawaya vovokaravisi irukwamakai na rabobowai ivomiiri. 53Ma karakava Yesu rabobowai ina vomiiri ma murinai nani wawayisi vovokaravisi ina rui ku Jerusalem da wawaya peyarisi ina kitisi.
54Ma seri damsi i senturiyon yavata Yesu ivivi matatetei na nukenuke damina iviiya ma aviyavisina peyarina itupuwa na ikitai da iyabumana kirakai ma ivona bo, “Vonavaghata, weni tomowina tuna God Natuna.”
55Ma wivine viya Gariri kamonai ivomiiri da Yesu yavata ibababa da kana vavai ivivi tava ma ikoyakoyaghi. Nani wivinesi imiiritaweyana da Yesu korosi tepanai ikitakitai, p 56ma kamosiyai na Meri Magadarini, Jemes ma Joses i maduwa Meri, ma Zebedi kawana, tuna Jemes ma Jon i maduwa.
Yesu tupuwina ku karawaga iterei.
(Mak 15:42-47; Luk 23:50-56; Jon 19:38-42)
57Ravi ipika ma mura tomowina sago inekiibau. Kana vava Josepa ma ina kwanatu na Arimateya, Judiya dobuna kamonai. Ma tuna Yesu kana kivikivina sago. 58Inae Pailat kurina ma ivi nowi da Yesu tupuwina ita viiya. Ma Pailat vivaghina sisiyina ivonatawei seri damsi kurisi da Josepa, Yesu tupuwina ita kavari. 59Ma Josepa inae da Yesu tupuwina korosiyai itereoruwei ma kwarewa vunai igerei. ▼ 60Ma Josepa namada buba sago iyamoni da karakava ita rabobo na tupuwina nani dobunai ita terei. Ma Yesu tupuwina ikavari inae ma nani bubana ku kamona iterei. Ma wakima ghamana itabiri da buba kawana igudupotai ma ikuyowei. 61Meri Magadarini ma Meri sago ivi ruwa imakai da karawaga imakiikarokaroni ma aviyavisina peyarina Josepa iberaberai na igayogayoi.Karawaga kana potapota.
62Mara itom na viyakam marana. Ma taparoro babadisi i babada ma Perisi damsi inae Pailat kurina. 63Ivonei bo, “Bada, Yesu na viviberona ma kanotanotai da ivona bo, ‘Ana rabobo ma mara viarobina kamonai rabobowai ana vomiiri.’ r 64Tuna kubiine seri damsi viya kevonatawesi da kana buba ina potapotai da mara aroba ina kovi. Nakanani kuna berai da kana kivikivina ke ruvaruvana da tupuwina ina yapini ma muriyai wawaya ina vonesi da tuna rabobowai ivomiiri. Mikeda nakanani ina tupuwa na weni viberona na ina bero kirakai, ke Yesu ina vibero viya nakanani.”65Ma Pailat ivonesi bo, “Vaghina, seri damsi yavata konae ma karawaga kopota bubuni.”
66Vaghina ma inae ma karawagai dobodobo iviiya ma buba matuketina ipasipotai, ivi matakira da wawaya ke ita votawei. Ma seri damsi iteresi da buba ipotapotai.
Copyright information for
PWG